Ar ôl i ni gasglu eich sampl gwaed, bydd yn cael ei rannu’n samplau llai. Byddwn yn defnyddio un sampl i echdynnu DNA (manylion genetig) a bydd gweddill y samplau yn cael eu storio ar gyfer ymchwil yn y dyfodol. Er enghraifft, efallai y byddwn yn defnyddio rhai o’ch samplau sydd wedi’u storio i edrych ar lefelau colestrol neu lefelau siwgr yn y gwaed yn y dyfodol.

Er bod 99% o DNA yr un fath i bob person, mae llawer o fân wahaniaethau yn DNA pobl. Amrywiolion yw’r enw a roddir ar y gwahaniaethau hyn, ac maen nhw’n gyfrifol am lawer o’r gwahaniaethau rhwng pobl, fel eu grŵp gwaed. Mae rhai amrywiolion yn gyffredin, a rhai yn brin.

Mae’n bwysig nodi bod rhai amrywiolion yn dylanwadu ar risg rhywun o ddatblygu gwahanol glefydau.

Byddwn yn defnyddio technoleg o’r enw arae SNP i edrych ar rai o’r amrywiolion yn eich DNA.

Os yw’n bosib, efallai y byddwn yn defnyddio proses o’r enw dilyniannu genomau, a thechnolegau genetig eraill, i edrych ar eich DNA. Mae’r broses dilyniannu genomau yn darllen ac yn cofnodi’r holl DNA yn eich genom (eich set gyfan o DNA) bron â bod.

Bydd eich samplau a’ch DNA yn cael eu storio er mwyn i ymchwilwyr eu dadansoddi yn y dyfodol.

Efallai y bydd ymchwilwyr yn defnyddio eich sampl i fesur rhannau eraill o’ch gwaed yn y dyfodol, i weld a ydyn nhw’n gysylltiedig ag iechyd a’r risg o afiechyd.

Yn eich apwyntiad, efallai y cewch ganlyniadau fel eich pwysedd gwaed. Os cymerir y mesuriadau hyn, bydd at ddibenion ymchwil, nid gwiriad iechyd personol.

Gan mai rhaglen ymchwil yw Our Future Health, ni fydd eich gwybodaeth yn cael ei defnyddio i gael diagnosis o gyflwr nac i drin cyflwr, ac ni fyddwch yn cael adborth personol ar eich samplau, eich DNA, na data arall yn awtomatig.

Fodd bynnag, byddwn yn cysylltu â chi yn y dyfodol i ofyn a fyddech chi’n hoffi cael adborth personol ar eich samplau, eich DNA, neu ddata arall. Efallai y cewch wybodaeth newydd am eich iechyd neu’ch risg o afiechyd yn yr adborth hwn. Byddwn bob amser yn rhoi rhagor o wybodaeth i chi ac yn rhoi cyfle i chi ofyn cwestiynau cyn i chi benderfynu, a gallwch gytuno neu anghytuno.

Bydd rhywfaint o’r ymchwil yn cael ei wneud gan ein hymchwilwyr ni yn Our Future Health, ond bydd y rhan fwyaf o’r gwaith yn cael ei wneud gan ymchwilwyr eraill.

Gall yr ymchwilwyr hyn fod o wledydd ym mhedwar ban byd, a gallent fod o sefydliadau fel prifysgolion, elusennau, neu ddiwydiant.

Bydd unrhyw ymchwilwyr sy’n gwneud cais i wneud ymchwil yn gorfod mynd drwy broses ymgeisio drylwyr, lle bydd eu cynigion yn cael eu hadolygu’n ofalus gan Fwrdd Mynediad. Bydd y Bwrdd Mynediad yn cynnwys arbenigwyr meddygol ac aelodau o’r cyhoedd i ddechrau. Bydd wedyn yn cynnwys aelodau o’r cyhoedd sy’n cymryd rhan yn rhaglen Our Future Health.

Dim ond cynigion ymchwil iechyd sy’n dod gan ymchwilwyr cofrestredig ac sydd er lles y cyhoedd fydd y Bwrdd Mynediad yn eu cymeradwyo. Dim ond data dienw amdanoch chi fydd unrhyw ymchwilwyr y rhoddir mynediad iddynt yn gallu ei weld. Mae hyn yn golygu na fyddant yn gallu gweld eich enw, eich manylion cyswllt, nac unrhyw wybodaeth sy’n datgelu pwy ydych chi fel unigolyn. Yn ogystal â hyn, bydd ymchwilwyr y rhoddir mynediad iddynt yn gorfod llofnodi cytundeb sy’n dweud na fyddant yn ceisio adnabod unrhyw rai o’r cyfranogwyr o’r data y maent yn gallu ei weld.

Our Future Health fydd yn gyfrifol am eich data a’ch samplau, a bydd yn rheoli pwy sy’n cael mynediad atynt yn llym. Hefyd, bydd unrhyw ymchwilwyr y rhoddir mynediad iddynt yn gorfod cytuno i ddiogelu eich data. Mae gofalu am eich preifatrwydd a diogelwch eich data yn bwysig iawn i ni.

Darllen mwy am sut rydym yn diogelu eich data

Bydd darganfyddiadau Our Future Health yn cael eu cyhoeddi mewn papurau gwyddonol a byddant ar gael ar-lein. Bydd eich manylion adnabod a’ch gwybodaeth bersonol yn cael eu cadw’n gyfrinachol.

Sylwch y bydd yn cymryd sawl blwyddyn i ddarganfyddiadau ddeillio o’r rhaglen ymchwil.

Gall unrhyw ymchwilwyr sy’n gwneud gwaith ymchwil gydag Our Future Health elwa o’u darganfyddiadau.

Gallwch ddewis cael negeseuon rheolaidd i gael yr wybodaeth ddiweddaraf am ein cynnydd a’r darganfyddiadau sy’n deillio o Our Future Health.